ازاي تعمل أول CV في حياتك مع نصائح هامة

خطوات بسيطة لعمل اول CV/Resume لتحصل علي تدريب او وظيفة.

1. الكتابة علي Template جاهز

الأفضل لك تنزيل ملف Word جاهز و تقوم بتغيير المحتوي فقط لا داعي للتفكير في كيفية تنسيق السيرة الذاتية و ليس من الجيد الاعتماد علي مواقع كتابة السيرة الذاتية لأن معظم الباحثين عن العمل يفضلوها و بالتالي الـTemplates ستكون منتشرة و لن تتميز في شيء. للحصول علي template جاهز، ابحث في جوجل عن "Free word templates for resume writing" و اختار ما يناسبك المهم انه يكون Word و اللون اسود فقط.

2. ترتيب المحتوي

- Contact Information
هنا بتكتب معلومات التواصل زي عنوانك و رقم موبايل واحد فقط و ليس رقم المنزل و يكون انت فقط من يرد عليه، تكتب اميل و لينك GitHub لو انت مبرمج او لينك Behance لو انت تخصصك UI/UX.

- Career Objective
هنا بتكتب انت عايز تشتغل مع الشركة دي تحديدا ليه و الافضل انك تركز علي ازاي هتقدر تفيدهم اكتر من ازاي انت هتستفاد.

- Education
هنا بتكتب اسم الجامعة و تقدير التخرج و سنة التخرج حتي لو لس طالب. اذا كان تقديرك مقبول فلا تكتبه و لا داعي لكتابة اسم المدرسة في المرحلة الثانوية او قبلها. لو الكلية/المعهد تخصصهم ليس لهم علاقة بالوظيفة فهتكتب الكورسات اللي اتعلمتها حتي لو اونلاين لوحدك طالما لها علاقة بالوظيفة و تلغي خانة الكورسات المذكورة في النقطة قبل الاخيرة.

- Work Experience
لو عندك خبرة عمل او تدريب في اي مجال ليس له علاقة بالوظيفة اكتبه لو مافيش غير الخبرة دي اما لو فيه خبرات عمل لها علاقة بالوظيفة فلا داعي لكتابة الوظائف الآخري. لو مافيش خبرة خالص تقدر تمسح كلمة Work و تترك كلمة Experience و تكتب الخبرة بتاعتك من خلال الانشطة التطوعية اللي شاركت فيها و يكون من الافضل ذكر انشطة لها علاقة بتخصصك لذلك لا احد يستهون و يتخرج من الكلية بدون مشاركة في انشطة تطوعية.

- Skills
اكتب فقط مهارات تتعلق بالوظيفة و رتبها حسب ترتيب المهارات المطلوبة في اعلان الوظيفة لتلفت النظر اسرع.

- Extra-curricular Activities
لو في خانة الخبرة ذكرت الانشطة التطوعية فلا داعي للخانة دي اما لو كان عندك خبرة عمل ذكرتها قبل كده فهتزود الخانة دي لاضافة خبرات الانشطة التطوعية لانها هتكون عامل مهم جدا لقبولك.

- Internships
نفس الشيء هتزود الخانة دي لو عندك خانة Work experience مخصصة للوظائف فقط و لم تذكر فيها اي تدريب لكن لو دمجت الوظائف مع التدريبات في خانة Experience فلا داعي للخانة دي و الأفضل طبعًا لو بامكانك فصل خانة Work Experience عن خانة Internships.

- Training/ Self-study courses
لو لم تذكر كورسات خارجية سواء علي النت او في سنتر تعليمي في خانة Education يمكنك ذكرها هنا و الأفضل لو كليتك لها علاقة بالوظيفة فتفصل خانة Education عن خانة Courses.

- Personal Information
دي آخر حاجة عشان مش مهمة غير للشباب فقط لان الشركات يهمها تعرف الحالة العسكرية للشاب لذلك ممكن نخليها أول حاجة او آخر حاجة بالنسبة للبنات.

3. تجنب الاخطاء الشائعة

- لا تضع صورتك غير لو طلبوها.

- لا تكتب في معلوماتك الشخصية جنسيتك الا لو كنت بتقدم علي وظيفة في دولة آخري وبلاش ديانتك طبعا و النوع ذكر او أنثي الا اذا كان اسمك يحمل النوعين. ممكن تمسح خانة المعلومات الشخصية لو مش محتاج تضيف حاجة.

- الاميل و رقم التليفون لازم يكونوا متاحين طول الوقت و اختار اميل بيوضح اسمك الحقيقي مش اسماء مستعارة.

- خط الكتابة يكون نوع واحد و يفضل نوع Times New Roman لأنه اسرع خط في القراءة و تجنب الالوان الكتير في الـCV بتاعك و دايزاين مش منسق.

- حاول تقرأ كويس الـmission و الـvision بتاعت الشركة و طلع منها جمل مفيدة تكتبها في الـObjective.

- تجنب اخطاء لغوية و تقدر تستعين ببرنامج Grammarly لتصحيح الاخطاء و تجنب التباين بين حروف Capital و Small يعني مينفعش تبدأ جملة بحرف small و كمان الكلام يكون تحت بعضه في محاذاة مستقيمة مش سطر جوا و سطر برا.

- اخيرًا، خير الكلام ما قل و دل فبلاش الـCV يبقي اكتر من صفحة و دايما وانت بتكتب يكون في دماغك ان الـHR بيقرأ السيرة الذاتية بتاعتك في 20 ثانية فقط! يا يلحق يشوف النقاط اللي هو يبحث عنها او يرمي الـCV بتاعك.


يا ريت تضيفوا اي ملحوظات عندكم، بالتوفيق.